နေပီယာပတ်ချောင်း(၁)မြက် Napier Pakchong (1) Grass
*******************************************************************
********************************************************************
နွားမွေးမြူရေးအတွက်အဓိကကျသော မြက်စိုက်ပျိုးခြင်းကိုမြေယာကျေးလက်ကြီးပွားတိုးတက်ရေး ကော်ပိုရေးရှင်း (မြေကျေးရှင်း) လက်ထက်မှစ၍ မြန်မာနိုင်ငံ၏ ဒေသအနှံ့အပြားတွင် ပြည်ပမှမြက်မျိုးစေ့များ တင်သွင်း၍ စိုက်ပျိုးခဲ့ပါသည်။ ဆက်လက်၍ခေတ်အဆက်ဆက်တွင် မွေးမြူရေးနှင့်သက်ဆိုင်သော ဌာနဆိုင်ရာ အသီးသီးသည်လည်း မြက်မျိုးများ၊ ပဲပင်မျိုးနွယ်(Legumes)များစသည့် အမျိုးမျိုးသော မျိုးစေ့များကို နွားစာအလို့ငှာ ပြည်ပမှတင်သွင်း၍ စိုက်ပျိုးခဲ့ကြပါသည်။
ဤသို့ဆောင်ရွက်ခဲ့မှုများကြောင့် ရန်ကုန်တိုင်းဒေသကြီးဝန်းကျင်တွင် ပါရာမြက်၊ နေပီယာမြက်၊ ဂျပန်မြက်၊ စင်ထရို(Centrosema)နှင့် စတိုင်လို(Stylo)မြက်မျိုးများသည် အလေ့ကျသဖွယ်ဆက်လက် ရှင်သန်ပြီး နွားခြံနှင့် အချို့နေရာများတွင် ကျန်ရှိနေပါသည်။ အိမ်နီးချင်းထိုင်းနိုင်ငံတွင် နေပီယာ၊ ရူဇီ၊ ပန်ဂိုလာနှင့် ဂီနီမြက်မျိုးများကို ထိုင်းနိုင်ငံ၏ရာသီဥတုနှင့် မြေအမျိုးအစားတို့နှင့် ကိုက်ညီပြိး အထွက်တိုး အောင်သုတေသနပြု၍ မျိုးမြှင့်တင် ဆောင်ရွက်နေကြပါသည်။ အထူးသဖြင့် နေပီယာမြက်မျိုးကို Saraburi ခရိုင် Pakchong ရှိတိရစ္ဆာန်အာဟာရ သုတေသနဌာနမှ မျိုးမြှင့်တင်ပြုပြင်၍ နေပီယာပတ်ချောင်း(၁) ဟုအမည်ပေးပြီး ထိုင်းနိုင်ငံတစ်ဝန်းရှိ နို့စားနွား မွေးမြူရေးခြံများသို့ ဖြန့်ဖြူးပေးပြီးစိုက်ပျိုးလျှက် ရှိကြောင်း သိရပါသည်။
FAO ၏ Regional Dairy Task Force(RDTF)အစည်းအဝေးကို ၂၀၁၁ခုနှစ်၊ အောက်တိုဘာလတွင် ချင်းမိုင်မြို့၌ ကျင်းပသောအခါ ဒေါက်တာထွန်းအောင်နှင့် ကျွန်တော်တက်ရောက်ခဲ့ပါသည်။ ၄င်းအစည်းအဝေးတွင် DLD လက်အောက်ရှိ လန်ပန်တိရစ္ဆာန် အာဟာရသုတေသနနှင့် ဖွံ့ဖြိုးရေး ဌာန(Lampang Animal Nutrition Research and Development Center) မှ နို့စားနွားခြံများအတွက် အစာကြမ်းထုတ်လုပ်ခြင်း (Establishing Forage Production for Dairy Farms) အကြောင်းကို ပါဝါပွိုင့်ဖြင့်ရှင်းလင်းတင်ပြပါသည်။ တင်ပြချက်အပြီးတွင် အပြည်ပြည်ဆိုင်ရာတိရစ္ဆာန်အာဟာရကျွမ်းကျင်သူ Dr. Amphon Waritthitham မှ မြန်မာအဖွဲ့ကိုလာရောက်နှုတ်ဆက်ရင်း ၄င်း၏တင်ပြချက်ကို စိတ်ဝင်စားမှုရှိပါ သလားးဟု မေးမြန်းသဖြင့် မိမိတို့မှ စိတ်ဝင်စားရုံမျှမက တင်ပြချက်တွင်ပါဝင်သော Napier Pakchoung မြက်မျိုးကို မြန်မာနိုင်ငံတွင် စမ်းသပ်စိုက်ပျိုးလိုကြောင်း တောင်းဆိုခဲ့ပါသည်။နောက်တစ်နေ့(၂၁-၁၁-၂၀၁၁)တွင် Lampang ဒေသရှိ Napier Pakchong မြက်စိုက်ခင်းသို့သွားရောက်လေ့လာသည့်အခါ Napier Pakchong မြက်အဆစ်နှစ်ဆစ်ပါသည့် ဖြတ်ပိုင်း (၁၂၀)စီကို လယ်သမားမှလက်ဆောင်အဖြစ်ပေးပြီး စိုက်နည်းစံနစ်ကိုပါ လက်တွေ့ပြသပါသည်။ ၄င်းမြက်မျိုးများကို မှော်ဘီမြို့နယ်ရှိ နွားခြံနှင့် အင်းစိန်မွေးကုဦးစီးဌာနမြေပေါ်တွင် မျိုးပွားစိုက်ပျိုးထားပါသည်။
ဌာနဆိုင်ရာဝန်ထမ်းအချို့နှင့် နွားမွေးမြူရေးလုပ်ငန်းရှင်များလည်း နေပီယာပတ်ချောင်းမြက်မျိုးများကို ထိုင်းနိုင်ငံမှ တင်သွင်း၍စိုက်ပျိုးကြကြောင်းသိရှိရပါသည်။ နေပီယာမြက်မျိုးဟောင်းနှင့် နေပီယာပတ်ချောင်းမြက်တို့၏ ကွာခြားပုံကို ရှင်းလင်းတင်ပြလိုပါသည်။
နေပီယာမြက်မျိုးဟောင်း၏ အားနည်းချက်မှာ ပင်စည်တွင်အမွှေးများပါပြီး၊ အရွက်များသည် ဓါးကဲ့သို့ရှသဖြင့် မြက်ရိတ်သူအဖို့အဆင်မပြေဖြစ်စေပါသည်။ အသားဓာတ်ပါဝင်မှုနှင့် အထွက်နှုန်းလည်းမျိုးဟောင်းတွင် နည်းပါးပါသည်။ နေပီယာပတ်ချောင်းမြက်တွင် ပင်စည်၌အမွှေးမပါသည့်အပြင် အရွက်များလည်းမရှပါ။ မြက်ခင်းသို့ထည့်သွင်းပေးသော မြေသြဇာကိုလိုက်၍နေပီယာပတ်ချောင်းမြက်တွင် အသားဓာတ် ၁၁ မှ ၁၈%အထိပါရှိပြီး အထွက်နှုန်းမှာ ဒုတိယနှစ်တွင် တစ်ဧကမြက်အစို (၁၇၅)တန်အထိထွက်ရှိပါသည်။
နေပီယာပတ်ချောင်းမြက်ကို တစ်ကြိမ်စိုက်ပျိုးထားပါက (၅)နှစ်အထိဆက်တိုက် အသုံးပြုနိုင်ပါ သည်။ ၄၅~၆၀ရက် တစ်ကြိမ်ရိတ်၍ ကျွေးနိုင်ပါသည်။ပင်စည်၏အရိုးတွင် သကြားဓာတ်ပါဝင်သဖြင့် မြက်အစိုကိုစင်း၍ မြက်ချဉ်ဖတ်ပြုလုပ်ပါက သကာရည်(molasses)ထည့်သွင်းရန်မလိုပဲ ကောင်းစွာအချဉ်ပေါက် (Fermentaton)ပြီး (၃)ပတ်အကြာတွင် အရည်အသွေး ကောင်းမြက်ချဉ်ဖတ်ရရှိပါသည်။ ထိုင်းနိုင်ငံတွင် နေပီယာမြက်အစိုတစ်ကီလိုလျှင် (၁) ဘတ်နှင့်ရောင်းရ၍ မြက်ချဉ်ဖတ် တစ်ကီလိုကိ(ု ၁.၄)ဘတ်ရောင်းရ ကြောင်း လေ့လာသိရှိခဲ့ရပါသည်။
ဆက်လက်၍ မြက်စိုက်ပျိုးနည်းကိုတင်ပြပါမည်။
မြေပြုပြင်ခြင်း
***************
ဦးစွာခြုံပင်၊ ဆူးပင်ပေါင်းပင်များကို ရှင်းလင်းရမည်။မြေပြုပြင်ရာတွင် သဘာဝမြေသြဇာ(နောက်ချေး) တစ်ဧကလျှင် (၁၀)တန် ကြဲပက်၍ မြေကိုညက်အောင်ထွန်ယက်ပါ။ နှစ်ရှည်ရိတ်သိမ်းနိုင်သည်ဖြစ်၍ မြေပြုပြင်ခြင်းကို စံနစ်တကျ သေချာအောင်ဆောင်ရွက်ရန် အရေးကြီးပါသည်။
စိုက်ပျိုးခြင်း
**************
မိုးကာလ သို့မဟုတ် မြေတွင်အစိုဓာတ်ရှိပါက မြက်အဆစ်နှစ်ခုပါဖြတ်ပိုင်း၏ အရင်းပိုင်းအဆစ် တစ်ဆစ်မြှပ်သည် အထိ မြေကြီးအတွင်းသို့ခပ်စောင်းစောင်းထိုးသွင်းစိုက်ပါ။ ဒုတိယအဆစ်မှာ မြေပြင်နှင့် ထိလုနီးပါးရှိအောင် ထား၍စိုက်ပါ။ သို့မှသာ ပထမအဆစ်နှင့် ဒုတိယအဆစ်နှစ်ခုစလုံးမှ အစို့များပေါက်ပြီး ဒုတိယအဆစ်မှ မြစ်ပွှားများ မြေတွင်းသို့ဝင်၍ အပင်အားကောင်းစေနိုင်ပါသည်။တစ်နေရာတွင် ဖြတ်ပိုင်း၂/၃ခု ထိုးသွင်းပြီးစိုက်ပါ။
အပင်ခြား (၄၀)မှ (၆၀)စင်တီမီတာနှင့် အတန်းခြား (၈၀)မှ (၁၂၀)စင်တီမီတာခွာ၍ စိုက်ခြင်းဖြင့် ရေသွင်းရန်၊ မြေသြဇာကျွေးရန်၊ ပေါင်းလိုက်ရန်နှင့် ရိတ်သိမ်းရန်လွယ်ကူပါသည်။ ကုန်းကျသောမြေနှင့် ခြောက်သွေ့သော ရာသီဥတု တို့တွင် ကြံစိုက်သလိုအလျားလိုက်ခြား၍လည်းစိုက်နိုင်သည်။
ပေါင်းနှိမ်နှင်းခြင်း
*******************
စိုက်ပြီးရက်(၃၀)ကြာက ပေါင်းလိုက်ပေးပါ။ပေါင်းအလွန်များပါက ဒုတိယအကြိမ်ပေါင်း လိုက်ပေးရန် လိုပါသည်။
ရေပေးသွင်းခြင်း
*******************
- မိုးကာလတွင် စားကျက်ခင်းသည်ရေစီးရေဆင်းကောင်းရမည်။
- စိုက်ပျိုးသည့်နေ့နှင့် စိုက်ပျိုးပြီး(၃)ရက်အကြာတွင် ရေပေးသွင်းရမည်။
- ရေပေးသွင်းရမည့်အကြိမ်မှာ မိုးရွာသွန်းမှုနှုင့်ရာသီဥတုအပေါ်တွင်မူတည်ပါသည်။
- နွေကာလတွင် ၃-၄ ရက်တစ်ကြိမ်ရေသွင်းပေးပါ။
မြေသြဇာကျွေးခြင်း
*********************
- ယူရီးယားသုံးပါက တစ်ဧကလျှင်(၅၀)ကီလိုဂရမ်နှုန်းဖြင့် ရိတ်သိမ်းပြီးချိန်တိုင်း ထည့်ပေးပါ။
- မြေဆီလွှာကောင်းရန်အတွက် တစ်ဧကတစ်နှစ်လျှင် နွားချေး ၇ ~ ၁၀တန်ထည့်ပေးပါ။
ရိတ်သိမ်းခြင်း
*******************
- ပထမဦးဆုံးအကြိမ်ရိတ်သိမ်းခြင်းကို မြက်စိုက်ပျိုးပြီး ရက်(၆၀)မှ (၇၅)အတွင်းပြုလုပ်ပါ။
- နောင်တွင်(၃၀ မှ ၄၅)ရက်တစ်ကြိမ်ရိတ်ပါ။
- တစ်နှစ်လျှင် (၆)ကြိမ်မှ(၈)ကြိမ်ရိတ်နိုင်ပါသည်။
- မြက်ရိတ်သည့်အခါ မြေကြီးနှင့်ကပ်၍ရိတ်ပါက အစို့ပေါက်များများထွက်စေနိုင်ပါသည်။
- မြက်အငုတ်များကျန်လျှင် မှုန်းပေးပါ
- မျိုးအဖြစ်အသုံးပြုရန်အတွက် အပင်ကို(၃)လ(၄)လထိထားပြီးမှ ရိတ်ပါ။
အပင်ရောဂါကာကွယ်ခြင်း
******************************
Napier Pakchong မြက်မျိုး၏ပင်စည်တွင် သကြားဓာတ်ပါဝင်သဖြင့် ကြံပင်တွင် ကျရောက် တတ်သော အူနီရောဂါကဲ့သို့ရောဂါများ ကျရောက်တတ်ပါသည်။ အူနီသောကြံပင်များ၊ အသုံးပြုပြီး ကြံပင်၊ ကြံဖတ်များအား မြက်စိုက်ခင်းအတွင်းသို့မရောက်ရှိစေရန် သတိပြုဖို့လိုပါသည်။
ပတ်ဝန်းကျင်ကိုထိန်းသိမ်းခြင်း
********************************
Napier Packchong မြက်သည် ရာသီမရွေး၊ မြေမရွေးဖြစ်ထွန်းသဖြင့် အခြားစိုက်ပျိုးမြေများသို့ ပျံ့နှံ့ရောက်ရှိ နိုင်မည့် အန္တရာယ်ရှိမရှိဆန်းစစ်ရန်လိုပါသည်။ ၄င်းမြက်မျိုးသည် ရက်(၆၀)ကျော်မှ အနှံထွက်သဖြင့် ရက် (၃၀ မှ ၄၅) အတွင်း အမြဲရိတ်ပါက အနှံမထွက်၍ ပတ်ဝန်းကျင်ကို ပျံ့နှံ့မှုမရှိနိုင်ပါ။ မျိုးပွားရန် အဆစ်ကိုသာအသုံးပြုခြင်းဖြင့် လိုအပ် သည့် နေရာတွင်သာ ကန့်သတ်စိုက်ပျိုးနိုင်ပါကြောင်းတင်ပြအပ်ပါသည်။
(ဒေါက်တာခင်လှိုင်)
Share this